کولیسٹرول کم کرنے والی ٹیکنالوجی سے متعلق اہم انکشاف!

جرمنی کی ٹیکنیکل یونیورسٹی آف ڈریسڈن میں کی جانے والی ایک جدید طبی تحقیق میں انکشاف ہوا ہے کہ خون سے کولیسٹرول کم کرنے کے لیے استعمال ہونے والی ایفیریسس (Apheresis) ٹیکنالوجی جسم میں موجود ضدی زہریلے ’فورایور کیمیکلز‘ اور مائیکرو پلاسٹکس کو خارج کرنے میں بھی مددگار ثابت ہو سکتی ہے۔ ایفیریسس مشینیں ایسے مریضوں کے علاج کے لیے استعمال کی جاتی ہیں جن کے خون میں کولیسٹرول کی سطح عام ادویات سے قابو میں نہیں آتی، جس کے تحت ایک بازو سے خون نکال کر اس میں موجود اضافی چکنائی کو فلٹر کرنے کے بعد دوسرے بازو کے ذریعے دوبارہ جسم میں منتقل کر دیا جاتا ہے۔ ڈریسڈن کے سب سے بڑے ایفیریسس سینٹر میں، جہاں سالانہ تقریباً 10 ہزار علاج کیے جاتے ہیں، سائنس دانوں نے استعمال شدہ فلٹر بیگز کا تجزیہ کر کے یہ اہم دریافت کی ہے۔ ماہرین کا کہنا ہے کہ مزید تصدیقی مراحل کے بعد یہ ٹیکنالوجی ماحول سے انسانوں کے اندر منتقل ہونے والی آلودگی کے خاتمے میں ایک انقلابی پیش رفت ثابت ہوگی۔