دانتوں میں کیڑا روکنے کا آسان علاج دریافت

سائنس دانوں نے دانتوں کے علاج کی دنیا میں ایک انقلابی اور آسان طریقہ دریافت کر لیا ہے، جس کے تحت بغیر کسی ڈرلنگ یا انجیکشن کے محض چند سیکنڈز کے اندر دانتوں کو کیڑا لگنے سے روکا جا سکتا ہے۔

امریکا میں ہونے والی ایک بڑی اور جامع تحقیق کے مطابق ’سلور ڈائی امائن فلورائیڈ‘ (Silver Diamine Fluoride) نامی محلول نے بچوں کے دودھ کے دانتوں کی خرابی کو نصف سے زائد کیسز میں کامیابی سے روک دیا ہے۔ یہ محلول چھوٹے بچوں کو درد، شدید انفیکشنز اور مہنگی سرجری کے مراحل سے بچانے میں انتہائی معاون ثابت ہو سکتا ہے۔

طبی ماہرین کا کہنا ہے کہ سلور ڈائی امائن فلورائیڈ، جسے مختصراً ‘SDF’ کہا جاتا ہے، روایتی علاج کے مقابلے میں ایک سستا، بے درد اور انتہائی آسان متبادل ہے۔ ڈینٹسٹ اس محلول کو ایک چھوٹے اسپنج نما آلے سے براہِ راست دانت کے متاثرہ حصے پر لگاتے ہیں، اور اس پورے عمل میں فی دانت صرف چند سیکنڈ کا وقت لگتا ہے۔ اس کی سب سے بڑی خوبی یہ ہے کہ اس علاج میں نہ تو ڈرلنگ کی ضرورت ہوتی ہے اور نہ ہی مریض کو کوئی درد کُش انجیکشن یا بے ہوشی کی دوا دی جاتی ہے۔

تحقیق میں واضح کیا گیا ہے کہ اگرچہ اس محلول کے استعمال سے دانت کا خراب یا متاثرہ حصہ مستقل طور پر سیاہ ہو جاتا ہے، تاہم یہ بچوں کو بالخصوص اور مریضوں کو بالعموم ان پیچیدگیوں سے بچاتا ہے جہاں اسپتال کے عام علاج میں ناکامی کے بعد انہیں مکمل بے ہوشی کی حالت میں تکلیف دہ سرجری کروانی پڑتی ہے۔