ایران اور عمان کے درمیان آبنائے ہرمز سے متعلق معاملات طے پاگئے: اسماعیل بقائی

ایرانی وزارتِ خارجہ کے ترجمان اسماعیل بقائی نے بتایا ہے کہ آبنائے ہرمز کے راستے کی جغرافیائی خصوصیات اور بحری امور سے متعلق ایران اور عمان کے درمیان تمام بنیادی معاملات طے پا گئے ہیں، اور دونوں ممالک کی جانب سے جلد باضابطہ اعلان متوقع ہے۔ ترجمان کا کہنا تھا کہ اگر کوئی تیسرا فریق اس عمل میں مداخلت نہ کرے تو تہران اور مسقط کے اتفاقِ رائے پر مبنی حتمی پیش رفت جلد سامنے آ جائے گی۔

ترجمان نے وضاحت کرتے ہوئے کہا کہ اس معاہدے کا یہ مطلب ہرگز نہیں کہ آبنائے ہرمز مکمل طور پر پابندیوں سے آزاد یا فوری طور پر ہر قسم کے بحری جہازوں کے لیے کھول دی جائے گی، بلکہ یہ محض بحری راستے کے تکنیکی اور انتظامی امور تک محدود ہے۔ اسماعیل بقائی نے یہ بھی بتایا کہ فی الحال ایرانی وزیرِ خارجہ یا سپیکر پارلیمنٹ کے دورہ پاکستان یا قطر کی کوئی تاریخ طے نہیں، تاہم ان ممالک سے اس معاملے پر مشاورت ہوئی ہے۔ انہوں نے امید ظاہر کی کہ تمام متعلقہ فریقین تحمل کا مظاہرہ کریں گے تاکہ خطے میں کشیدگی میں کمی لائی جا سکے۔