پاک ایران سرمایہ کاری بڑھانے پر اتفاق، کراچی تا چاہ بہار تجارتی راہداری کی تجویز

وفاقی وزیر برائے بورڈ آف انویسٹمنٹ قیصر احمد شیخ سے ایرانی کاروباری وفد نے اسلام آباد میں ملاقات کی، جس میں تجارت، سرمایہ کاری کے فروغ اور دوطرفہ اقتصادی تعاون پر تفصیلی تبادلہ خیال کیا گیا۔ ملاقات میں پاکستان اور ایران کے درمیان مشترکہ سرمایہ کاری کے نئے مواقع تلاش کرنے پر زور دیا گیا، جبکہ دوطرفہ تجارتی حجم بڑھانے کے لیے “کراچی تا چاہ بہار” تجارتی راہداری قائم کرنے کی اہم تجویز بھی زیرِ غور آئی۔

وفاقی وزیر قیصر احمد شیخ نے گفتگو کرتے ہوئے کہا کہ دونوں ممالک کے درمیان اقتصادی تعاون کے وسیع امکانات موجود ہیں۔ انہوں نے چاول، پیٹروکیمیکل اور اسٹیل کے شعبوں میں مشترکہ منصوبوں اور بارٹر (جنس کے بدلے جنس) تجارت کے فروغ کی تجویز پیش کی۔ وفاقی وزیر نے بتایا کہ ایران کو سالانہ 30 لاکھ ٹن چاول درکار ہوتے ہیں، جس میں پاکستانی چاول کا حصہ بڑھ کر 40 فیصد تک پہنچ چکا ہے۔ اس موقع پر ڈائریکٹر جنرل محمود طفیل نے بھی دوطرفہ تعاون بڑھانے کے عزم کا اعادہ کیا، جبکہ ایرانی وفد نے وفاقی وزیر قیصر احمد شیخ کو ایران کا رسمی دورہ کرنے کی دعوت دی۔