نیتن یاہو کا حماس کے غیر مسلح ہونے تک غزہ میں کارروائیاں جاری رکھنے کا اعلان

اسرائیلی وزیراعظم بنیامین نیتن یاہو نے وائٹ ہاؤس میں گفتگو کرتے ہوئے کہا ہے کہ امریکی صدر ڈونلڈ ٹرمپ اسرائیل کے عظیم دوست ہیں، تاہم معاہدہ طے پائے یا نہ پائے، اسرائیل اپنے دفاع اور سلامتی کے لیے تمام ضروری اقدامات کرے گا۔ نیتن یاہو نے واضح کیا کہ حماس کے مکمل طور پر غیر مسلح ہونے اور ہتھیار ڈالنے تک اسرائیلی افواج غزہ میں اپنی موجودہ فوجی پوزیشنوں سے پیچھے نہیں ہٹیں گی۔

امریکی حکام کے مطابق یہ پیش کش صدر ڈونلڈ ٹرمپ کے 20 نکاتی امن منصوبے کا حصہ تھی، جس کے تحت اسرائیل کو غزہ میں اپنی پیش قدمی روک کر پچھلی جنگ بندی کی “یلو لائن” تک واپس جانا تھا اور حماس کے ہتھیار ڈالنے کے بدلے مرحلہ وار انخلا کرنا تھا۔ تاہم نیتن یاہو نے امریکی مسودے کو قبول کرنے سے انکار کرتے ہوئے اپنی تجاویز واپس بھیج دیں اور مؤقف اختیار کیا کہ اسرائیل اپنی سلامتی پر کوئی سمجھوتہ نہیں کرے گا۔ یروشلم میں امن نمائندوں کی نیتن یاہو سے ملاقات کے باوجود کوئی پیش رفت نہیں ہو سکی، جبکہ اسرائیلی وزیراعظم نے فوج کو تمام کارروائیاں جاری رکھنے کی ہدایت کر دی ہے۔