صومالی وزیرِ دفاع کی نیول چیف اور ایئر چیف سے ملاقاتیں، دفاعی تعاون پر تبادلۂ خیال

صومالیہ کے وزیرِ دفاع احمد معلم فقی نے نیول ہیڈکوارٹرز اور ایئر ہیڈکوارٹرز اسلام آباد کا دورہ کیا، جہاں انہوں نے پاک بحریہ کے سربراہ ایڈمرل نوید اشرف اور پاک فضائیہ کے سربراہ ایئر چیف مارشل ظہیر احمد بابر سدھو سے الگ الگ ملاقاتیں کیں۔ پاک فوج کے شعبہ تعلقات عامہ (آئی ایس پی آر) کے مطابق نیول ہیڈکوارٹرز میں ہونے والی ملاقات کے دوران دونوں رہنماؤں نے باہمی دفاعی تعاون، علاقائی بحری سلامتی اور دوطرفہ عسکری روابط کے فروغ پر تفصیلی تبادلہ خیال کیا۔ اس موقع پر نیول چیف نے صومالیہ کے ساتھ دفاعی تعلقات کو مزید مضبوط بنانے کے عزم کا اعادہ کیا، جبکہ صومالی وزیرِ دفاع نے خطے میں بحری سلامتی کے لیے پاک بحریہ کے مؤثر کردار کو سراہا۔

آئی ایس پی آر کے مطابق بعد ازاں ایئر ہیڈکوارٹرز میں ایئر چیف مارشل ظہیر احمد بابر سدھو سے ملاقات کے دوران دفاعی تعاون، استعدادِ کار میں اضافے اور پیشہ ورانہ روابط پر گفتگو کی گئی۔ ایئر چیف نے پاک فضائیہ کی مقامی دفاعی صلاحیتوں، جدید تربیتی نظام اور صومالی فضائیہ کی ادارہ جاتی مدد جاری رکھنے کے عزم کا اظہار کیا۔ صومالی وزیرِ دفاع نے پاک فضائیہ کی پیشہ ورانہ مہارت اور آپریشنل صلاحیتوں کی تعریف کی۔ دونوں اہم ملاقاتوں میں پاکستان اور صومالیہ نے دفاعی و عسکری تعاون کے دائرہ کار کو مزید وسعت دینے پر مکمل اتفاق کیا۔