حیدرآباد میں سی ٹی ڈی کی انٹیلیجنس بیسڈ کارروائی میں دہشت گرد گرفتار

محکمہ انسدادِ دہشت گردی (سی ٹی ڈی) نے حیدرآباد کے علاقے قاسم آباد میں انٹیلیجنس بیسڈ کامیاب کارروائی کرتے ہوئے انتہائی مطلوب دہشت گرد سومار ملاح کو گرفتار کر لیا ہے۔ سی ٹی ڈی ترجمان کے مطابق یہ اقدام سحرش نگر میں کیا گیا جہاں ملزم کو حراست میں لیا گیا اور اس کے قبضے سے واردات میں استعمال ہونے والا اسلحہ بھی برآمد کر لیا گیا۔

ابتدائی تحقیقات کے مطابق گرفتار ملزم سومار ملاح نے 30 جولائی کو تھانہ ہٹڑی کی حدود میں سی ٹی ڈی کی پولیس پارٹی پر فائرنگ کی تھی، جس کے بعد سے وہ پولیس کو مطلوب تھا۔ ترجمان نے مزید بتایا کہ کارروائی کے دوران ملزم کا ایک ساتھی موقع سے فرار ہونے میں کامیاب ہو گیا جس کی گرفتاری کے لیے علاقے کی ناکہ بندی کر دی گئی ہے اور مقامی پولیس کی معاونت سے سرچ آپریشن اور تفتیش کا عمل جاری ہے۔