وزیراعظم اپنی مدت پوری کرینگے، تمام وزارتوں کا تھرڈ پارٹی آڈٹ کرایا جائے: محسن نقوی

وفاقی وزیر داخلہ محسن نقوی نے کہا ہے کہ وہ اپنی کارکردگی پر وزیراعظم کو جوابدہ ہیں، اس لیے ان کی اپنی وزارت سمیت تمام وزارتوں کی تھرڈ پارٹی ایویلیوایشن اور آڈٹ کرایا جائے اور اس کے نتائج عوام کے سامنے پیش کیے جائیں۔ دنیا نیوز سے خصوصی گفتگو کرتے ہوئے محسن نقوی کا کہنا تھا کہ بطور وزیر ان کی پرفارمنس پر سوالات اٹھائے جا رہے ہیں، لیکن وہ غیر جانبدارانہ جائزہ لینے کے لیے تیار ہیں۔ انہوں نے واضح کیا کہ ان کی کابینہ میں حاضری 70 فیصد کے قریب ہے اور وہ چاہتے ہیں کہ تمام وزارتوں کی پرفارمنس کا شفاف آڈٹ ہو۔

وفاقی وزیر داخلہ نے ملکی انتظامی ڈھانچے پر بات کرتے ہوئے کہا کہ ملک میں گزشتہ 80 سال سے جو نظام چل رہا ہے وہ تباہ حال ہے، اگر یہ نظام درست چل رہا ہوتا تو پاکستان کہیں زیادہ ترقی کر چکا ہوتا۔ انہوں نے وزیراعظم کی قیادت کی تعریف کرتے ہوئے کہا کہ وزیراعظم روزانہ 14 سے 16 گھنٹے کام کر رہے ہیں، موجودہ حالات میں بھی ریونیو میں اضافہ ہوا ہے اور ایف بی آر میں اصلاحات کی گئی ہیں۔ محسن نقوی نے اس عزم کا بھی اظہار کیا کہ وزیراعظم اپنی 5 سالہ آئینی مدت مکمل کریں گے اور موجودہ حکومت مضبوطی سے قائم ہے۔