ایف آئی اے کی بڑی کارروائی؛ غیر قانونی فارماسیوٹیکل فیکٹری سیل، جعلی ادویہ برآمد

وفاقی تحقیقاتی ادارے (FIA) کے اینٹی کرپشن سرکل نے راولپنڈی کے علاقے روات میں ایک بڑی کارروائی کرتے ہوئے غیر قانونی فارماسیوٹیکل اسٹوریج اور پروڈکشن فیسلٹی کو سیل کر دیا ہے۔ ترجمان کے مطابق چھاپے کے دوران حفظانِ صحت کے اصولوں اور SOPs کی شدید خلاف ورزیوں پر بھاری مقدار میں جعلی اور ملاوٹ شدہ ادویات، 15 لاکھ خالی کیپسول شیلز، ہزاروں ادویات، انجیکشنز، 20 ہزار سے زائد سیرپ اور 66 ہزار سے زائد خالی بوتلیں ضبط کر لی گئی ہیں۔ موقع پر موجود ڈرگ انسپکٹر نے سائنسی تجزیے اور لیبارٹری ٹیسٹنگ کے لیے ادویات کے نمونے حاصل کر لیے ہیں۔ FIA حکام کا کہنا ہے کہ عوامی صحت کے ساتھ کھیلنے والے عناصر کے خلاف کریک ڈاؤن بلا تفریق جاری رکھا جائے گا۔