دو سالہ جلاوطنی کے بعد شیخ حسینہ کا بنگلادیش واپسی کا اعلان

بنگلادیش کی سابق وزیراعظم شیخ حسینہ نے دو سالہ جلاوطنی کے بعد وطن واپس آنے کا باضابطہ اعلان کرتے ہوئے کہا ہے کہ وہ رواں سال دسمبر میں ملک واپسی کی خواہش رکھتی ہیں، تاہم حتمی تاریخ کا اعلان مناسب وقت پر کیا جائے گا۔ 78 سالہ شیخ حسینہ نے جنوبی ایشیا کے غیر ملکی صحافیوں کے کلب کے زیر اہتمام تقریب سے ویڈیو لنک کے ذریعے خطاب کیا۔ اس موقع پر ان کے صاحبزادے سجیب واجد جوئے اور عوامی لیگ کے دیگر اہم رہنما بھی موجود تھے۔

شیخ حسینہ نے اپنے خطاب میں کہا کہ وطن واپسی پر انہیں گرفتار کیا جا سکتا ہے یا جیل بھی بھیجا جا سکتا ہے، لیکن کوئی بھی خوف ان کے عوام کے لیے ذمہ داری نبھانے کے عزم کو متزلزل نہیں کر سکتا۔ انہوں نے کہا کہ وہ اپنے ملک کے عوام کو مشکل وقت میں اکیلا چھوڑ کر بیرون ملک مقیم نہیں رہ سکتیں۔ سابق وزیراعظم نے اپنی سیاسی جماعت عوامی لیگ پر عائد پابندی ختم کرنے کا بھی زوردار مطالبہ کیا۔ واضح رہے کہ شیخ حسینہ 2024 میں طلبہ کی قیادت میں ہونے والے پرتشدد احتجاجی مظاہروں کے بعد اقتدار سے الگ ہو کر بھارت منتقل ہو گئی تھیں اور تب سے وہ جلاوطنی کی زندگی گزار رہی ہیں۔