سسٹم والا بیان بے معنی، ملک میں ہائبرڈ نہیں، آئینی جمہوری نظام ہے: رانا ثنا اللہ

وزیراعظم کے مشیر اور سینیٹر رانا ثناء اللہ نے کہا ہے کہ پاکستان میں ہائبرڈ نہیں بلکہ 1973 کے آئین کے تحت مکمل آئینی و پارلیمانی جمہوری نظام کام کر رہا ہے۔ نجی ٹی وی کے پروگرام میں گفتگو کرتے ہوئے انہوں نے وفاقی وزیر داخلہ محسن نقوی کے “سسٹم تباہ ہو چکا” والے بیان کو بے معنی قرار دیا اور کہا کہ وفاق، عدلیہ اور انتظامیہ سب اپنے آئینی دائرہ کار میں ذمہ داریاں ادا کر رہے ہیں، اس لیے نظام کی تباہی کی بات درست نہیں۔ انہوں نے واضح کیا کہ بااختیار بلدیاتی نظام اور انتظامی اصلاحات پر آئین کے اندر رہتے ہوئے ہی بات ہو سکتی ہے۔

رانا ثناء اللہ کا کہنا تھا کہ سیاسی اور عسکری قیادت کے باہمی تعاون، احترام اور قومی یکجہتی کے باعث پاکستان کو عالمی سطح پر عزت ملی ہے اور دہشت گردی کے خلاف کامیابی حاصل ہوئی ہے۔ انہوں نے فیلڈ مارشل عاصم منیر کو قوم کا ہیرو قرار دیتے ہوئے کہا کہ انہوں نے ملک کا وقار بلند کیا ہے۔ مشیر وزیراعظم نے آزاد کشمیر کے عام انتخابات کو شفاف قرار دیتے ہوئے کہا کہ عوام کی بھرپور شرکت نے انتخابی عمل میں رکاوٹ ڈالنے والے عناصر اور بھارتی ایجنڈے کو ناکام بنا دیا ہے۔