امریکا نے پاسداران انقلاب سے منسلک تین اداروں پر عائد پابندیاں ختم کردیں

امریکہ نے ایران کی پاسدارانِ انقلاب (IRGC) سے مبینہ طور پر منسلک تین فضائی اداروں پر عائد دہشت گردی مخالف پابندیاں ختم کرنے کا اعلان کر دیا ہے، جس کی باضابطہ تصدیق امریکی وزارتِ خزانہ (US Department of the Treasury) نے کر دی ہے۔ ان اداروں پر یہ پابندیاں پاسدارانِ انقلاب کو مبینہ معاونت اور تعلق کی بنیاد پر عائد کی گئی تھیں۔

پابندیاں ختم کیے جانے کے اس غیر متوقع امریکی فیصلے کے فوری بعد عالمی توانائی منڈی میں خام تیل کی قیمتوں میں نمایاں کمی ریکارڈ کی گئی ہے۔ عالمی منڈی میں امریکی ویسٹ ٹیکساس انٹرمیڈیٹ (WTI) خام تیل گھٹ کر 75.06 ڈالر فی بیرل جبکہ برینٹ (Brent) خام تیل کی قیمت 78.83 ڈالر فی بیرل پر آ گئی ہے۔ معاشی ماہرین کا کہنا ہے کہ پابندیوں میں اس نرمی سے عالمی منڈی میں ایرانی تیل کی رسد بڑھنے کی توقعات کو تقویت ملی ہے، جس نے تیل کی بین الاقوامی قیمتوں کو مزید نیچے دھکیل دیا ہے۔