خلا میں ڈیٹا سینٹر قائم کرنے کا منصوبہ

مصنوعی ذہانت (AI) اور کلاؤڈ کمپیوٹنگ کی بڑھتی ہوئی ضروریات کے پیش نظر ایلون مسک اور جیف بیزوس سمیت دنیا کی بڑی ٹیکنالوجی کمپنیوں نے خلا میں ڈیٹا سینٹرز قائم کرنے کا منصوبہ تیار کر لیا ہے۔ اسپیس ایکس (SpaceX) اور بلیو اوریجن (Blue Origin) جیسی کمپنیوں کا دعویٰ ہے کہ نچلے مدار میں ڈیٹا سینٹرز کی منتقلی سے شمسی توانائی کے ذریعے بے پناہ بجلی حاصل کی جا سکے گی اور زمین پر توانائی کے دباؤ اور حرارت میں کمی آئے گی۔ تاہم، ماہرینِ ماحولیات اور ‘ارتھ جسٹس’ کے سائنسدانوں نے امریکی فیڈرل کمیونیکیشنز کمیشن (FCC) میں درخواست دائر کرتے ہوئے ان منصوبوں پر گہری تشویش کا اظہار کیا ہے۔ ماہرین نے انتباہ جاری کیا ہے کہ لاکھوں مصنوعی سیاروں اور راکٹ لانچز میں اضافے سے اوزون کی تہہ کو شدید نقصان، خلائی ملبے میں اضافہ، رات کے آسمان کی قدرتی شکل کی تبدیلی اور جنگلی حیات پر منفی اثرات مرتب ہو سکتے ہیں، اس لیے جامع جائزہ لیے بغیر لائسنس جاری نہ کیے جائیں۔