اسپیس ایکس کا راکٹ اپنے مدار سے بھٹک گیا، آج کسی بھی وقت چاند سے ٹکرانے کے خدشہ

امریکہ کی نجی خلائی کمپنی اسپیس ایکس (SpaceX) کا Falcon 9 راکٹ آج کسی بھی وقت چاند کی سطح سے ٹکرانے کے قریب پہنچ گیا ہے۔ یہ وہی راکٹ ہے جس نے جنوری 2025 میں امریکی کمپنی فائر فلائی ایرو اسپیس کے ‘بلیو گھوسٹ’ اور جاپانی کمپنی آئی اسپیس کے ‘ریزیلینس’ قمری لینڈرز کو خلا میں روانہ کیا تھا۔ ماہرین کے مطابق لانچ کے بعد راکٹ کا پہلا مرحلہ کامیابی سے زمین پر واپس آ گیا تھا جبکہ دوسرا یعنی بالائی حصہ مشنز کو چاند کی جانب دھکیلنے کے بعد خلا میں ہی موجود رہا۔ اسپیس ایکس میں ناسا سائنس اور ڈریگن پروگرامز کی ڈائریکٹر جولیانا شیمین کے مطابق سورج کی شمسی سرگرمیوں اور کششِ ثقل کے مشترکہ اثرات نے اس راکٹ کے بالائی حصے کا راستہ تبدیل کر دیا جس سے وہ چاند سے تصادم کے راستے پر گامزن ہو گیا۔ اگرچہ اس تصادم سے زمین کو کوئی خطرہ نہیں ہے، تاہم سائنس دان اسے چاند کی سطح پر اثرات اور خلائی ملبے کی حرکت کو سمجھنے کے لیے ایک انتہائی اہم موقع قرار دے رہے ہیں۔