گوگل نے اپنی ارتھ سروس سے متنازع فیچر واپس لے لیا

معروف ٹیکنالوجی کمپنی گوگل نے اپنے نقشہ جاتی پلیٹ فارم ‘گوگل ارتھ’ میں متعارف کرایا گیا نیا مصنوعی ذہانت (AI) فیچر صرف 01 دن بعد ہی پالیسی خلاف ورزیوں کی وجہ سے واپس لے لیا ہے۔ یہ فیچر کمپنی کے ‘نینو بنانا 2’ اے آئی ماڈل پر مبنی تھا، جس کے ذریعے صارف تحریری ہدایت (Prompt) کی مدد سے دنیا کے کسی بھی مقام کی سیٹلائٹ اور تھری ڈی ڈیٹا پر مبنی حقیقت سے قریب تر تصاویر تیار کر سکتے تھے۔ گوگل ارتھ کے پروڈکٹ مینیجر برائن ہورووٹز کے مطابق اگرچہ جغرافیائی ماہرین اس فیچر کو مفید مقاصد کے لیے استعمال کر رہے تھے، تاہم کچھ صارفین کی جانب سے پالیسی کے منافی تصاویر شیئر کیے جانے پر یہ فیصلہ کیا گیا۔ کمپنی کے مطابق اے آئی تصاویر پر واٹرمارک موجود تھا اور وہ تمام تر حفاظتی اقدامات (Guardrails) کے نفاذ کے بعد اس فیچر کو دوبارہ متعارف کرائے گی۔