کراچی میں پہلی ٹیکنیکل مائننگ کانفرنس 6 اگست کو ہوگی، اربوں ڈالر کے معاہدے متوقع

پاکستان کی پہلی ‘ٹیکنیکل مائننگ کانفرنس’ 06 اگست کو کراچی میں منعقد ہو رہی ہے، جس میں متحدہ عرب امارات، جاپان، جرمنی اور چین کی عالمی سطح کی مائننگ کمپنیاں شرکت کریں گی۔ اس موقع پر اربوں ڈالر کی غیر ملکی سرمایہ کاری کے مفاہمتی یادداشتوں (MoUs) پر دستخط متوقع ہیں۔ سندھ اینگرو مائننگ کمپنی کے سی ای او عامر اقبال نے بتایا کہ اس ایونٹ کا بنیادی مقصد ملک میں جدید مائننگ ٹیکنالوجی کا فروغ اور معدنی شعبے میں غیر ملکی سرمایہ کاری جذب کرنا ہے۔ انہوں نے مزید بتایا کہ ملک بھر کے پاور پلانٹس کو تھر کا کوئلہ منتقل کرنے کے لیے نئی ریلوے لائن کا آغاز اگلے سال کے آغاز میں کر دیا جائے گا۔ علاوہ ازیں، اگلے ماہ تھر بلاک ٹو کے تیسرے مرحلے کی توسیع شروع ہو رہی ہے اور ‘لکی پاور پلانٹ’ کو کوئلے کی فراہمی کا آغاز کیا جائے گا، جبکہ سندھ اینگرو مائننگ میں اب تک 01 ارب 40 کروڑ ڈالر کی ریکارڈ سرمایہ کاری کی جا چکی ہے۔