شزہ فاطمہ سے اوورسیز طلبہ کے وفد کی ملاقات، ڈیجیٹل پاکستان ویژن پر تبادلہ خیال

وفاقی وزیر برائے آئی ٹی و ٹیلی کام شزہ فاطمہ خواجہ سے اوورسیز اور بین الاقوامی جامعات میں زیرِ تعلیم پاکستانی طلبہ کے وفد نے ملاقات کی، جس کے دوران وزیراعظم کے ‘Digital Nation’ ویژن، مصنوعی ذہانت (AI)، ٹیلی کام اصلاحات اور ڈیجیٹل پاکستان کے مستقبل پر 01 گھنٹہ طویل نشست ہوئی۔ اس موقع پر وفاقی وزیر نے بتایا کہ حکومت ملک بھر میں 4G اور 5G کنیکٹیویٹی کے فروغ اور جدید انفراسٹرکچر کی بہتری کے لیے ترجیحی بنیادوں پر کام کر رہی ہے تاکہ نوجوانوں کو جدید ٹیکنالوجی کی مہارتوں سے آراستہ کیا جا سکے۔ انہوں نے فری لانسرز، طلبہ اور اسٹارٹ اپس کے لیے جاری سرکاری اقدامات کا احاطہ بھی کیا۔ ملاقات کے اختتام پر اوورسیز طلبہ نے وزارتِ آئی ٹی کے انقلابی اقدامات کی تعریف کی اور عالمی سطح پر پاکستان کے ڈیجیٹل ویژن کے سفیر بننے کے عزم کا اعادہ کیا۔