نیند کے دوران لوگوں کو درپیش ایک عام مسئلہ بڑے خطرے کی علامت قرار

نیند کے دوران خراٹے لینے کا عام سا نظر آنے والا مسئلہ درحقیقت جان لیوا ہائی بلڈ پریشر کی ابتدائی نشانی ہو سکتا ہے، جس سے فالج (Stroke) اور ہارٹ فیلیئر کا خطرہ کئی گنا بڑھ جاتا ہے۔ آسٹریلیا کی فلینڈرز یونیورسٹی کی جانب سے کی گئی ایک حالیہ تحقیق کے مطابق، درمیانی عمر کے مردوں میں خراٹے لینے اور بلڈ پریشر میں اضافے کے درمیان گہرا تعلق پایا گیا ہے۔ اس مطالعے میں ماہرین نے جدید مانیٹرنگ ٹیکنالوجیز کا استعمال کرتے ہوئے رات کے وقت نیند کے معیار اور خون کے دباؤ کا باریک بینی سے جائزہ لیا۔

تحقیق کے دوران یہ بات سامنے آئی کہ وہ افراد جو اضافی جسمانی وزن کے مالک تھے، وہ دیگر کے مقابلے میں اوسطاً 20 فیصد زیادہ خراٹے لیتے تھے۔ مجموعی طور پر تحقیق میں شامل 15 فیصد افراد میں یہ عادت مستقل بنیادوں پر پائی گئی۔ ماہرین کا کہنا ہے کہ یہ پہلی مرتبہ ہے جب سائنسی طور پر اتنے پختہ شواہد ملے ہیں کہ رات کے وقت مسلسل خراٹے لینا ہائی بلڈ پریشر کی دعوت دیتا ہے، جو آگے چل کر دل کی سنگین بیماریوں کا سبب بنتا ہے۔

محققین نے خبردار کیا ہے کہ خراٹوں کو محض ایک عام عادت سمجھ کر نظر انداز نہیں کرنا چاہیے بلکہ بلڈ پریشر کو کنٹرول میں رکھنے اور دل کی صحت کو یقینی بنانے کے لیے خراٹوں پر قابو پانے کی کوشش کرنی چاہیے۔ طبی ماہرین کے مطابق، وزن میں کمی، سونے کے انداز میں تبدیلی اور ضرورت پڑنے پر معالج سے رجوع کرنا فالج اور ہارٹ اٹیک جیسے جان لیوا خطرات سے بچا سکتا ہے۔ اس تحقیق نے نیند کی صحت اور قلبی امراض کے درمیان تعلق کے حوالے سے ایک نئی بحث چھیڑ دی ہے۔