پولیس افسروں اور جوانوں کی عظیم قربانیاں پوری قوم کیلئے باعث فخر ہیں: صدر مملکت

صدر مملکت آصف علی زرداری نے یومِ شہدائے پولیس کے موقع پر اپنے خاص پیغام میں پولیس کے ان بہادر افسران اور جوانوں کو خراجِ تحسین پیش کیا ہے جنہوں نے وطنِ عزیز کے امن و سلامتی کے لیے اپنی جانوں کا نذرانہ پیش کیا۔ صدر زرداری نے کہا کہ پاکستان پولیس جرائم، دہشت گردی اور پرتشدد انتہا پسندی کے خلاف صفِ اول کا کردار ادا کر رہی ہے۔ انہوں نے بالخصوص خیبر پختونخوا اور بلوچستان کے پولیس اہلکاروں کی غیر معمولی بہادری، پیشہ ورانہ مہارت اور دہشت گردوں کے خلاف موثر کارروائیوں کو سراہا۔ صدر مملکت نے شہداء کے اہل خانہ کے صبر و حوصلے کو سلام پیش کرتے ہوئے ان کی فلاح و بہبود کو قومی ذمہ داری قرار دیا اور اس عزم کا اعادہ کیا کہ پولیس کو جدید ٹیکنالوجی، بہتر تربیت اور ضروری وسائل فراہم کر کے مزید مضبوط بنایا جائے گا۔