فوجی دستوں سے مکمل رابطہ، استعفیٰ نہیں دوں گا اور ڈٹا رہوں گا: ایرانی صدر

ایرانی صدر مسعود پزشکیان نے کہا ہے کہ وہ موجودہ چیلنجز کے باوجود استعفیٰ نہیں دیں گے اور اپنے موقف پر قائم رہیں گے۔ برطانوی نشریاتی ادارے کے مطابق ایرانی ذرائع ابلاغ کی جانب سے جاری کردہ ویڈیو بیان میں صدر پزشکیان کا کہنا تھا کہ حکومت ملکی فوجی دستوں کے ساتھ مکمل رابطے میں ہے اور ایران اپنی سرحدی حدود و خود مختاری کا دفاع ہر قیمت پر کرے گا، تاہم وہ جنگ کو وسعت دینے کا خواہاں نہیں۔ دوسری جانب تہران نے امریکی صدر ڈونلڈ ٹرمپ کے اس دعوے کو مکمل طور پر مسترد کر دیا ہے جس میں انہوں نے ایران کے ساتھ مذاکرات جاری ہونے کا ذکر کیا تھا۔ سرکاری خبر رساں ایجنسی ‘ارنا’ کے مطابق ایرانی صدر نے زور دیا کہ ملک میں ایسی مضبوط معاشرت اور یکجہتی قائم کرنے کی ضرورت ہے جو دشمن کو دراندازی، مداخلت یا آپس میں تقسیم پیدا کرنے کا کوئی موقع نہ فراہم کر سکے۔