پاکستان کی چین کو ایک ارب30 کروڑ ڈالر کی ری فنانسنگ کیلئے باضابطہ درخواست

حکومتِ پاکستان نے چین کو 1.3 ارب ڈالر (ایک ارب 30 کروڑ ڈالر) کی تجارتی قرض ری فنانسنگ کا عمل جلد از جلد مکمل کرنے کی باضابطہ درخواست کر دی ہے۔ وزارتِ خزانہ کے ذرائع کے مطابق پاکستانی اور چینی حکام کے مابین اس سلسلے میں مسلسل مذاکرات جاری ہیں اور شرائط و ضوابط فائنل ہوتے ہی یہ رقم رواں ماہ کے دوران ہی پاکستان کو دوبارہ موصول ہو جائے گی۔ یاد رہے کہ گزشتہ ماہ جولائی میں پاکستان نے مجموعی طور پر 2.2 ارب ڈالر کی بیرونی ادائیگیاں کی تھیں، جن میں سے 1.3 ارب ڈالر کا چینی کمرشل قرضہ بھی شامل تھا۔ حکام کے مطابق اس رقم کی واپسی سے ملکی زرمبادلہ کے ذخائر کو مستحکم سہارا ملے گا، جبکہ اسٹیٹ بینک آف پاکستان نے بیرونی ادائیگیوں کے توازن کے لیے رواں مالی سال کے دوران انٹربینک مارکیٹ سے 07 ارب ڈالر سے زائد رقم خریدنے کا ہدف مقرر کیا ہے۔