لبنان اور اسرائیل کے مذاکرات شرمندگی اور ذلت کا باعث ہوں گے: حزب اللہ

حزب اللہ کے سربراہ نعیم قاسم نے کہا ہے کہ لبنان اور اسرائیل کے درمیان براہِ راست مذاکرات لبنان کے لیے شرمندگی، ذلت اور مسلسل سمجھوتوں کے سوا کچھ نہیں لائیں گے۔ روم میں ہونے والے لبنان اور اسرائیل کے متوقع مذاکرات سے قبل ٹیلی ویژن پر نشر ہونے والے اپنے خطاب میں نعیم قاسم نے لبنانی صدر جوزف عون کو شدید تنقید کا نشانہ بناتے ہوئے کہا کہ انہوں نے ثالث کا کردار ادا کرنے کے بجائے جانبدارانہ رویہ اختیار کیا جو ان کے آئینی منصب کے منافی ہے۔ حزب اللہ کے سربراہ نے مزید کہا کہ ایران ایک بااثر عالمی طاقت کے طور پر ابھرا ہے اور سپریم لیڈر مجتبیٰ خامنہ ای کی قیادت میں مزید کامیابیاں حاصل ہوں گی۔ ان کا کہنا تھا کہ ایران اور امریکا کے درمیان ہونے والے معاہدے (MoU) کے باعث ہی لبنان پر اسرائیلی حملوں کی شدت میں کمی آئی ہے کیونکہ ایران نے لبنان سے متعلق معاملات کو معاہدے کی پہلی شق میں شامل کرایا۔