مریم نواز سے خوشاب کے ایم پی ایز کی ملاقات، عوامی مسائل کے حل کی یقین دہانی

وزیراعلیٰ پنجاب مریم نواز شریف سے خوشاب کے ارکانِ صوبائی اسمبلی آصف ملک اور ظفر عباس خان نے ملاقات کی، جس میں ملکی سیاسی صورتحال، جاری ترقیاتی منصوبوں اور حلقے کو درپیش عوامی مسائل پر تفصیلی تبادلۂ خیال کیا گیا۔ ملاقات کے دوران ارکانِ اسمبلی نے وزیراعلیٰ کو خوشاب میں درپیش مسائل سے آگاہ کیا، جس پر وزیراعلیٰ نے ان کے فوری اور مؤثر حل کی یقین دہانی کرائی۔ ارکانِ اسمبلی نے آزاد جموں و کشمیر میں مسلم لیگ (ن) کی کامیابی اور عوام کا اعتماد حاصل کرنے پر وزیراعلیٰ کو مبارکباد دی، جبکہ خوشاب میں الیکٹرک بس سروس کے آغاز اور آزاد کشمیر کے لیے 10 الیکٹرک بسوں کا تحفہ دینے پر شکریہ ادا کیا۔ اس موقع پر مریم نواز شریف کا کہنا تھا کہ مسلم لیگ (ن) قائد محمد نواز شریف کی قیادت میں پنجاب اور پورے ملک کو آگے لے کر جا رہی ہے اور آج پنجاب امن و امان سمیت ہر شعبے میں نمایاں کارکردگی دکھا رہا ہے۔