لندن میں مقیم پاکستانیوں کو جائیداد کی ڈیجیٹل منتقلی کی سہولت مل گئی

پاکستان ہائی کمیشن لندن نے وزیراعظم پاکستان کے وژن کے تحت بیرونِ ملک مقیم پاکستانیوں کے لیے پنجاب میں جائیداد کی براہِ راست ڈیجیٹل منتقلی کی نئی قونصلر سہولت کا باضابطہ آغاز کر دیا ہے۔ سماجی رابطے کی ویب سائٹ ایکس (X) پر جاری ایک بیان میں ہائی کمیشن نے واضح کیا کہ اس جدید اور محفوظ ڈیجیٹل نظام کے تحت اب اوورسیز پاکستانیوں کو پاور آف اٹارنی، کسی ایجنٹ يا تیسرے فریق کی خدمات حاصل کرنے اور نہ ہی جائیداد کی منتقلی کے لیے پاکستان کا سفر کرنے کی ضرورت پڑے گی۔ یہ نظام طریقہ کار کو نہ صرف شفاف اور تیز رفتار بناتا ہے بلکہ اوورسیز پاکستانیوں کے وقت اور اخراجات میں بھی نمایاں بچت کا باعث ہے۔ ہائی کمیشن کے مطابق اس سلسلے میں مسٹر فضل اور ان کے اہل خانہ کی جائیداد کی ڈیجیٹل منتقلی کامیابی سے مکمل کی جا چکی ہے، جو کہ اس پروجیکٹ کی عملداری کا بین ثبوت ہے۔