خیبرپختونخوا میں ڈیجیٹل تعلیمی انقلاب، 2 برس میں شرح خواندگی 35 فیصد بڑھانے کا ہدف

وزیراعلیٰ خیبرپختونخوا محمد سہیل آفریدی کی زیرِ صدارت ڈیجیٹل تعلیمی اصلاحات کا اعلیٰ سطحی اجلاس منعقد ہوا، جس میں “پڑھو خیبر پختونخوا” منصوبے کے تحت صوبائی نصاب کو مکمل ڈیجیٹلائز کرنے کا فیصلہ کیا گیا۔ اس منصوبے کے تحت تمام درسی کتب آف لائن سمارٹ فونز پر دستیاب ہوں گی جبکہ اگست کے آخر تک 500 اسکولوں کو ورچوئل لرننگ نظام سے منسلک کر دیا جائے گا۔ وزیراعلیٰ نے بتایا کہ 05 ارب روپے کی ابتدائی سرمایہ کاری سے سالانہ 100 ارب روپے سے زائد کی بچت ہو گی اور اگلے 02 سال میں شرح خواندگی میں 30 سے 35 فیصد اضافہ کیا جائے گا۔ اس ڈیجیٹل پلیٹ فارم پر مصنوعی ذہانت (AI) اور اساتذہ کے مشترکہ تعاون سے اردو، انگریزی اور پشتو میں تدریس کے علاوہ سائنس اور 06 بین الاقوامی زبانوں کی ورچوئل لیبارٹریز بھی قائم کی جائیں گی، جس سے بالخصوص بچیوں کی تعلیم میں حائل رکاوٹیں دور کرنے میں مدد ملے گی۔