روسی اور قطری وزرائے خارجہ کا رابطہ، مشرقِ وسطیٰ کی صورتحال پر تبادلہ خیال

روسی وزیرِ خارجہ سرگئی لاوروف اور قطر کے وزیراعظم و وزیرِ خارجہ شیخ محمد بن عبدالرحمن آل ثانی کے درمیان اہم ٹیلیفونک رابطہ ہوا ہے، جس میں دونوں ممالک نے دوطرفہ دوستانہ تعلقات کو مزید فروغ دینے اور مشرقِ وسطیٰ کی تازہ صورتحال پر تفصیلی گفتگو کی۔ روسی وزارتِ خارجہ کے مطابق گفتگو کے دوران روس اور قطر کے درمیان سیاسی روابط کو مزید مضبوط بنانے کے ساتھ ساتھ تجارت، سرمایہ کاری، ثقافتی اور انسانی تعاون میں اضافے کے عزم کا اعادہ کیا گیا۔ دونوں رہنماؤں نے خلیج فارس میں بڑھتی ہوئی کشیدگی پر تشویش کا اظہار کرتے ہوئے فوری طور پر جنگی کارروائیاں بند کرنے اور 17 جون کو طے پانے والے “اسلام آباد میمورنڈم” کی بنیاد پر جلد از جلد مذاکراتی عمل دوبارہ شروع کرنے کی ضرورت پر اتفاق کیا۔