سابق کٹھ پتلی وزیراعلیٰ فاروق عبداللہ نے مودی حکومت کو کشمیر میں دہشتگردی کا ذمہ دار قرار دیدیا

مقبوضہ کشمیر کے سابق کٹھ پتلی وزیر اعلیٰ فاروق عبداللہ نے مودی حکومت کے سیکیورٹی بیانیے پر سنگین سوالات اٹھاتے ہوئے الزام عائد کیا ہے کہ بھارتی حکومت کشمیر میں ہونے والی دہشت گردی کی خود ذمہ دار ہے۔ بھارتی میڈیا کے مطابق فاروق عبداللہ نے کولگام واقعے میں پاکستان کو ملوث کرنے کا دعویٰ رد کرتے ہوئے سوال اٹھایا کہ اگر بارڈر مکمل کنٹرول میں ہے اور حالات نارمل ہیں تو یہ قاتل کہاں سے آ رہے ہیں اور مقبوضہ کشمیر کا اسٹیٹ ہوڈ کیوں بحال نہیں کیا جا رہا؟ انہوں نے کہا کہ جب بھی کشمیر کے خصوصی تشخص یا اسٹیٹ ہوڈ کا مطالبہ زور پکڑتا ہے، ایسے مشکوک واقعات رونما ہو جاتے ہیں۔

دوسری جانب میر واعظ عمر فاروق اور کانگریس پارٹی نے بھی بی جے پی کے بیانیے کو رد کرتے ہوئے خطے میں مذاکرات پر زور دیا ہے۔ سیاسی ماہرین کے مطابق کولگام کا واقعہ دہلی سرکار کی سیکیورٹی ڈرامے بازی کا تسلسل ہے، جس کا مقصد جنتر منتر احتجاج اور دیگر داخلی بحرانوں سے عوامی توجہ ہٹانا اور مقبوضہ کشمیر میں بھارتی فوج کی بڑی تعداد کی موجودگی کو جواز فراہم کرنا ہے۔