یونیورسل ہیلتھ کوریج کے تحت اب شہری نجی اسپتالوں میں مفت علاج کروا سکتے ہیں، مصطفیٰ کمال

وفاقی وزیر صحت سید مصطفیٰ کمال نے کہا ہے کہ یونیورسل ہیلتھ کوریج پروگرام کے تحت گلگت بلتستان، اسلام آباد اور آزاد جموں و کشمیر کے شہری نجی اسپتالوں میں مفت علاج کی سہولت حاصل کر سکتے ہیں۔

ان خیالات کا اظہار انہوں نے کراچی کے علاقے جیکب لائن صدر میں دوسرے ڈیجیٹلائزڈ ہیلتھ سینٹر کی افتتاحی تقریب سے خطاب کرتے ہوئے کیا۔ انہوں نے کہا کہ یہ ہمارے لیے خوشی کا موقع ہے اور ہم اللہ تعالیٰ کا شکر ادا کرتے ہیں کہ ہمیں ایک مرتبہ پھر انسانیت کی خدمت کا موقع ملا۔

وفاقی وزیر صحت نے انسانیت کی خدمت کی اہمیت پر زور دیتے ہوئے ایک حدیث کا حوالہ دیا اور کہا کہ اللہ تعالیٰ مخلوق سے محبت کرتا ہے اور کسی ضرورت مند کی تکلیف کم کرنا بڑے اجر کا باعث بنتا ہے۔

انہوں نے کہا کہ وفاقی وزارت صحت کوئی عام سرکاری محکمہ نہیں بلکہ اللہ کی مخلوق کی تکالیف کم کرنے کے مشن پر کام کر رہی ہے۔ انہوں نے اعتراف کیا کہ ملک کا ہیلتھ کیئر نظام شدید دباؤ کا شکار ہے اور کورونا وبا نے یہ ثابت کر دیا کہ اگر ایک وقت میں بڑی تعداد میں لوگ بیمار ہو جائیں تو ترقی یافتہ ممالک بھی متاثر ہوتے ہیں۔

سید مصطفیٰ کمال نے کہا کہ پاکستان میں بغیر کسی وبا کے بھی ہر سال لاکھوں افراد بیمار ہو رہے ہیں۔ ہر سال تقریباً 61 لاکھ بچے پیدا ہوتے ہیں جن میں سے 4 لاکھ بچوں کو حفاظتی ٹیکوں کی ایک بھی خوراک نہیں ملتی جبکہ لاکھوں بچے صرف ایک خوراک تک محدود رہ جاتے ہیں۔

انہوں نے کہا کہ ہیلتھ کیئر کا مطلب صرف مریضوں کا علاج نہیں بلکہ بیماریوں سے بچاؤ ہے اور یہ ذمہ داری صرف وزیر صحت کی نہیں بلکہ یو سی کونسلر سے لے کر پورے نظام کی مشترکہ ذمہ داری ہے۔