کراچی میں ریبیز سے 11 سالہ بچہ جاں بحق، ہلاکتوں کی تعداد 22 ہوگئی

کراچی: آوارہ کتوں کی بچھاڑ اور سگ گزیدگی کے واقعات کے بعد سندھ میں ریبیز (Rabies) کے باعث ایک اور بچہ زندگی کی بازی ہار گیا، جس کے بعد رواں سال صوبے میں ریبیز سے جاں بحق ہونے والے افراد کی مجموعی تعداد 22 تک پہنچ گئی ہے۔

جناح پوسٹ گریجویٹ میڈیکل سینٹر (JPMC) کراچی کے حکام کے مطابق، زیرِ علاج 11 سالہ بچہ ابوبکر جمعہ کی صبح دورانِ علاج دم توڑ گیا۔ ہسپتال انتطامیہ کا کہنا ہے کہ جاں بحق بچے کا تعلق اندرونِ سندھ کے ضلع میرپور خاص سے تھا، جسے شدید حالت میں چند روز قبل علاج اور نگہداشت کے لیے کراچی کے جناح ہسپتال لایا گیا تھا۔

متوفی بچے کے والد نے میڈیا کو بتایا کہ ابوبکر کو تقریباً دو ماہ قبل ایک آوارہ کتے نے کاٹا تھا، جس کے بعد مقامی سطح پر اسے اینٹی ریبیز ویکسین (ARV) بھی لگوائی گئی تھی، تاہم اس کی حالت سنبھل نہ سکی اور وہ طویل تڑپ کے بعد جاں بحق ہو گیا۔

سندھ بھر میں آوارہ کتوں کی روز افزوں تعداد اور سگ گزیدگی کے مسلسل واقعات کے باعث ریبیز سے ہونے والی ہلاکتوں میں اضافہ شدید تشویش کا باعث بن رہا ہے۔ طبی ماہرین نے اینٹی ریبیز ویکسین کی کوالٹی، بروقت فراہمی اور کولڈ چین کی دیکھ بھال پر سوالات اٹھائے ہیں، جبکہ عوامی حلقوں نے حکومتِ سندھ اور بلدیاتی اداروں سے آوارہ کتوں کی تلفی اور کنٹرول کے لیے فوری اقدامات کا مطالبہ کیا ہے۔