فون سے اسکرین شاٹ محفوظ کرنا یادداشت کمزور کر سکتا ہے: تحقیق

موبائل فون سے کسی اہم لمحے کی تصویر بنانا یا سکرین شاٹ محفوظ کرنا بظاہر چیزوں کو یاد رکھنے میں مددگار معلوم ہوتا ہے، تاہم ایک نئی سائنسی تحقیق میں انکشاف ہوا ہے کہ ایسا کرنے سے انسانی دماغ کی معلومات کو یاد رکھنے کی صلاحیت کمزور ہو سکتی ہے۔

امریکا کی بِنگہیمٹن یونیورسٹی کے شعبہ نفسیات سے وابستہ محققین کی جانب سے کی جانے والی تحقیق کے مطابق، جو افراد کسی چیز کو یاد رکھنے کے لیے خود اس کی تصویر کھینچتے ہیں، بعد میں اس کی باریک تفصیلات یاد رکھنے کے معاملے میں وہ ان لوگوں کے مقابلے میں پیچھے رہ جاتے ہیں جنہوں نے تصویر نہیں بنائی ہوتی۔ معروف سائنسی جریدے ’میموری اینڈ کاگنیشن‘ میں شائع ہونے والی اس تحقیق میں ماہرین نے اس عمل کو ’فوٹو-ٹیکنگ امپیئرمنٹ ایفیکٹ‘ (Photo-Taking Impairment Effect) کا نام دیا ہے۔

تحقیق کی مرکزی مصنفہ صوفیہ فیبریزیو کے مطابق لوگ کسی واقعے یا معلومات کی تفصیلی معلومات زیادہ آسانی سے بھول جاتے ہیں اگر وہ بعد میں اپنے فون میں محفوظ کی گئی تصاویر کا دوبارہ جائزہ نہ لیں۔

محققین کا کہنا ہے کہ جدید دور میں ہر اسمارٹ فون صارف کی گیلری میں ہزاروں تصاویر محفوظ ہوتی ہیں جن میں روزانہ کی بنیاد پر مزید اضافہ ہوتا رہتا ہے۔ اگرچہ بعد میں تصاویر دیکھنا یادداشت کو تازہ کرنے میں مدد دے سکتا ہے، لیکن صرف تصویر کھینچ کر اسے کیمرہ رول میں چھوڑ دینا اور دوبارہ نہ دیکھنا دماغی یادداشت کو بہتر بنانے کی بجائے اسے سست کرنے کا سبب بنتا ہے۔