گووندا کو اگلے جنم میں شوہر کے طور پر نہیں دیکھنا چاہتی، اہلیہ سنیتا آہوجا

ممبئی: بالی وڈ کے معروف اداکار گووندا کی اہلیہ سنیتا آہوجا نے اپنی ازدواجی زندگی کے حوالے سے حیران کن انکشافات کرتے ہوئے کہا ہے کہ گووندا ایک اچھے بیٹے اور بھائی تو ہیں، مگر ایک اچھے شوہر ہرگز نہیں، اور وہ اگلے جنم میں انہیں شوہر کے طور پر دیکھنا نہیں چاہتیں۔

بھارتی میڈیا رپورٹس کے مطابق سنیتا آہوجا نے ایک حالیہ انٹرویو میں اپنی شادی، گووندا کی ماضی کی غلطیوں اور ایک اسٹار کی بیوی ہونے کی مشکلات پر کھل کر بات کی۔ انہوں نے کہا کہ “انسان کو خود پر قابو رکھنا سیکھنا چاہیے، جوانی میں سب سے غلطیاں ہوتی ہیں، ہم دونوں سے بھی ہوئیں، مگر عمر کے ایک حصے کے بعد ایسی غلطیاں کرنا ٹھیک نہیں لگتا۔”

سنیتا نے بتایا کہ اختلافات کے باوجود ان کے بچوں سے محبت نے انہیں مضبوط رکھا۔ ان کا کہنا تھا کہ “گووندا کی سوچ الگ ہے اور میری الگ، میں آج صرف اپنے بچوں کی محبت کی وجہ سے زندہ ہوں، ہمیشہ محسوس کرتی ہوں کہ میرے بچے صرف مجھ سے ہی پیار کرتے ہیں۔”

انہوں نے مزید کہا کہ “گووندا ایک ہیرو ہیں، وہ بیویوں سے زیادہ ہیروئنوں کے ساتھ وقت گزارتے ہیں۔ ایک اسٹار کی بیوی بننے کے لیے عورت کو بہت مضبوط ہونا پڑتا ہے، دل کو پتھر کا بنانا پڑتا ہے، اور مجھے یہ سمجھنے میں 38 سال لگے۔”

انٹرویو کے آخر میں سنیتا آہوجا نے کہا کہ “گووندا بہت اچھے بیٹے اور بھائی ہیں لیکن اچھے شوہر بالکل نہیں، میں انہیں اگلے جنم میں بھی شوہر کے طور پر نہیں دیکھنا چاہوں گی۔”