صومالیہ کی یرغمال پاکستانیوں کی بحفاظت وطن واپسی کی یقین دہانی

صومالی قزاقوں کے ہاتھوں 10 پاکستانی شہریوں کے اغوا کے معاملے پر صومالیہ کی حکومت نے پاکستان کو تحریری طور پر بھرپور تعاون کی یقین دہانی کرائی ہے۔ سفارتی ذرائع کے مطابق، پاکستان کی جانب سے اس معاملے کو صومالی حکام کے سامنے اٹھایا گیا تھا، جس پر صومالی وزارتِ خارجہ نے صورتحال کا بغور جائزہ لینے اور مغویوں کی محفوظ واپسی کے لیے ہر ممکن مدد فراہم کرنے کا وعدہ کیا ہے۔ وفاقی وزیر بحری امور جنید انور چودھری نے اس حوالے سے صومالی سفیر کو مراسلہ بھی بھیجا تھا۔ واضح رہے کہ بحری جہاز Honour 25 پر قبضے کے بعد سے عملے کے 10 سے زائد اراکین یرغمال ہیں، جن کا تعلق کراچی اور دیگر علاقوں سے ہے۔ مغویوں کے اہل خانہ شدید کرب کا شکار ہیں اور انہوں نے حکومتِ پاکستان سے فوری اور ٹھوس اقدامات کا مطالبہ کیا ہے۔