حنا طارق نے عورتوں کا ’فیمنسٹ‘ ہونا لعنت قرار دے دیا

پاکستانی اداکارہ حنا طارق نے خواتین کے حقوق اور فیمنزم کے حوالے سے انتہائی سخت موقف اختیار کرتے ہوئے عورتوں کے ‘فیمنسٹ’ ہونے کو ‘لعنت’ قرار دے دیا ہے۔ ایک حالیہ انٹرویو میں انہوں نے جدید تعلقات اور صنفی کرداروں پر گفتگو کرتے ہوئے کہا کہ انہیں حد سے زیادہ حساس یا ‘پوکی’ مرد پسند نہیں، بلکہ وہ ایک ایسے شریکِ حیات کی خواہشمند ہیں جو مردانہ صفات کا حامل، مضبوط اور خودمختار ہو۔ حنا طارق کا ماننا ہے کہ اگرچہ وہ مالی طور پر خود کفیل ہیں، لیکن وہ چاہتی ہیں کہ ان کا مرد گھر کے کرائے، پیٹرول اور دیگر عملی ذمہ داریاں سنبھالے تاکہ وہ ایک عورت کے طور پر محبت اور توجہ سے لطف اندوز ہو سکیں۔ انہوں نے ان خواتین پر بھی تنقید کی جو مردوں کے کردار کو اپنانے کی کوشش کرتی ہیں، ان کے بقول عورت ایک نازک مخلوق ہے جسے غصے کے بجائے مرد کی حفاظت اور محبت کی ضرورت ہوتی ہے۔