وفاقی آئینی عدالت نے سندھ ہائیکورٹ فیصلہ معطل کردیا

وفاقی آئینی عدالت نے سندھ حکومت کے ایک پروجیکٹ میں گریڈ 17، 18 اور 19 میں براہِ راست بھرتیوں کے معاملے پر سندھ ہائیکورٹ کا فیصلہ معطل کر دیا ہے۔ جسٹس حسن رضوی کی سربراہی میں تین رکنی بینچ نے سماعت کے دوران حیرت کا اظہار کیا کہ پبلک سروس کمیشن کے بغیر اتنے اعلیٰ گریڈز پر بھرتیاں کیسے کی گئیں۔ ایڈیشنل ایڈووکیٹ جنرل سندھ نے عدالت کو بتایا کہ 11 افراد کو ایک پروجیکٹ کے تحت بھرتی کیا گیا تھا جو اب ختم ہو چکا ہے، اور سندھ ہائیکورٹ نے ان ملازمین کا معاملہ پبلک سروس کمیشن کو بھیجنے کا حکم دیا تھا۔ جسٹس حسن رضوی نے ریمارکس دیے کہ ایسا لگتا ہے بھرتیوں میں غلطی ہوئی ہے جسے درست کرنا ضروری ہے، انہوں نے ملازمین کو مشورہ دیا کہ اگر وہ 8 سال ملازمت کر چکے ہیں تو پبلک سروس کمیشن کا امتحان کلیئر کریں۔ عدالت نے تمام فریقین کو نوٹسز جاری کر دیے ہیں۔