ٹک ٹاکر ثنا یوسف قتل کیس، ملزم کی ٹرائل منتقلی کی درخواست مسترد

اسلام آباد ہائیکورٹ نے ٹک ٹاکر ثنا یوسف قتل کیس کا ٹرائل دوسری عدالت منتقل کرنے کی ملزم عمر حیات کی درخواست مسترد کر دی ہے۔ چیف جسٹس سرفراز ڈوگر نے حکم دیا ہے کہ ایڈیشنل ڈسٹرکٹ اینڈ سیشن جج افضل مجوکہ ہی کیس کی سماعت جاری رکھیں گے۔ دوسری جانب سیشن کورٹ میں کیس کی کارروائی کے دوران استغاثہ کے گواہ کا بیان ریکارڈ کیا گیا، تاہم وکیلِ صفائی کی اچانک طبیعت ناساز ہونے کے باعث جرح مکمل نہ ہو سکی، جس پر عدالت نے سماعت 30 اپریل تک ملتوی کر دی۔ واضح رہے کہ ثنا یوسف کو جون 2025 میں اسلام آباد کے سیکٹر G-13 میں قتل کیا گیا تھا؛ ملزم عمر حیات نے گرفتاری کے بعد اعترافی بیان بھی ریکارڈ کروا رکھا ہے جس کے مطابق اس نے مبینہ طور پر رابطہ نہ کرنے اور انکار پر یہ سنگین قدم اٹھایا۔