امریکا اور ایران کے ساتھ سفارتی رابطے برقرار، امن کیلئے بھرپور کوشش کر رہے ہیں: دفتر خارجہ

ترجمان دفتر خارجہ طاہر حسین اندرابی نے بتایا ہے کہ وزیراعظم شہباز شریف کی قیادت میں پاکستان خطے میں کشیدگی کم کرنے کے لیے سرگرم عمل ہے، جس کے تحت ایران، سعودی عرب، قطر اور ترکیہ کی قیادت سے اہم رابطے ہوئے ہیں۔ ترکیہ کے صدر اور قطری قیادت نے پاکستان کے مصالحانہ کردار کو سراہا ہے، جبکہ وزیراعظم نے ایرانی وفد کے دورہ اسلام آباد کا خیرمقدم کیا ہے۔ ترجمان نے واضح کیا کہ پاکستان اور سعودی عرب اسٹریٹجک دفاعی شراکت دار ہیں اور دونوں ممالک کے تعلقات مثالی ہیں۔ مزید برآں، پاکستان نے صومالیہ کی خود مختاری کی حمایت کرتے ہوئے صومالی لینڈ کو صومالیہ کا حصہ قرار دیا ہے۔ ترجمان نے افغانستان سے ہونے والی سرحد پار فائرنگ کی شدید مذمت کرتے ہوئے متاثرہ خاندانوں سے یکجہتی کا اظہار کیا اور کہا کہ پاکستان اپنی سرحدوں کے تحفظ کے لیے تمام ممکنہ اقدامات کر رہا ہے۔