اللہ کا واسطہ ہے کراچی کی سڑکیں ٹھیک کردیں،شگفتہ اعجاز حکمرانوں پر برس پڑیں

نامور اداکارہ شگفتہ اعجاز نے کراچی کے انفراسٹرکچر اور صفائی کی ابتر صورتحال پر شدید برہمی کا اظہار کرتے ہوئے شہر کو “گندا” قرار دے دیا ہے۔ ایک نجی ٹی وی پروگرام میں گفتگو کرتے ہوئے انہوں نے کہا کہ کراچی ان کا اپنا شہر ہے اور اس کی خامیوں کی نشاندہی کرنا بہتری کے لیے ضروری ہے۔ اداکارہ نے حکام سے اپیل کی کہ شہر کی ٹوٹی پھوٹی سڑکوں اور جگہ جگہ پھیلی گندگی کا نوٹس لیا جائے، کیونکہ ناقص انفراسٹرکچر کی وجہ سے شہریوں کی روزمرہ زندگی اجیرن ہو چکی ہے اور ہنگامی صورتحال میں نقل و حرکت شدید متاثر ہوتی ہے۔ شگفتہ اعجاز کے اس بیان نے سوشل میڈیا پر ایک نئی بحث چھیڑ دی ہے، جہاں صارفین کی بڑی تعداد شہر کے بنیادی مسائل کو اجاگر کرنے پر ان کے موقف کی تائید کر رہی ہے۔