وزیراعلیٰ پنجاب کا کچہ ایریا کے لیے 23 ارب روپے کے ترقیاتی پیکج کا اعلان

وزیراعلیٰ پنجاب مریم نواز شریف نے کچہ کے علاقوں میں پائیدار امن اور خوشحالی کے لیے 23 ارب روپے کے میگا ڈویلپمنٹ پیکج کی منظوری دے دی ہے۔ اس منصوبے کے تحت “اپنا کھیت، اپنا روزگار” پروگرام کا آغاز کیا جا رہا ہے جس میں 14 ہزار 500 ایکڑ سرکاری زمین کچہ کے باسیوں میں تقسیم کی جائے گی۔ وزیراعلیٰ نے سیکیورٹی کے لیے جدید ترین سولر ڈرونز اور سیف سٹی مانیٹرنگ سسٹم متعارف کرانے کے ساتھ ساتھ تعلیم، صحت اور انفراسٹرکچر کے درجنوں منصوبوں کا حکم دیا ہے۔ منصوبے کا ایک اہم پہلو ناجائز اسلحہ کی واپسی ہے، جس کے تحت رضاکارانہ طور پر اسلحہ جمع کرانے والوں کو ڈیجیٹل مانیٹرنگ کے ذریعے مالی معاوضہ دیا جائے گا۔ مریم نواز نے واضح کیا کہ کچہ کے عوام کو بھی ترقی کا وہی حق حاصل ہے جو پنجاب کے دیگر شہروں کے شہریوں کو ہے۔