پاک بحریہ کی پہلی ‘ہنگور کلاس’ آبدوز بیڑے میں شامل؛ صدرِ مملکت کی چین میں کمیشننگ تقریب میں شرکت

پاکستان کے بحری دفاع میں ایک نئے باب کا اضافہ کرتے ہوئے، پاک بحریہ کی پہلی جدید ترین ‘ہنگور کلاس’ آبدوز کو چین میں ایک باوقار تقریب کے دوران کمیشن کر دیا گیا ہے۔ صدرِ مملکت آصف علی زرداری تقریب کے مہمانِ خصوصی تھے، جبکہ نیول چیف ایڈمرل نوید اشرف بھی ان کے ہمراہ موجود تھے۔ صدر زرداری نے اس موقع پر خطاب کرتے ہوئے اسے پاک بحریہ کی جدت کے سفر میں ایک سنگِ میل قرار دیا اور کہا کہ پاکستان اپنی خودمختاری اور معاشی راہداریوں کے تحفظ کی مکمل صلاحیت رکھتا ہے۔ نیول چیف ایڈمرل نوید اشرف نے بتایا کہ یہ آبدوزیں جدید ترین ‘ایئر انڈیپنڈنٹ پروپلشن’ (AIP) ٹیکنالوجی اور اسٹیلتھ ڈیزائن سے لیس ہیں، جو بحیرہ عرب میں دشمن کی جارحیت روکنے اور تجارتی گزرگاہوں کی سلامتی یقینی بنانے میں کلیدی کردار ادا کریں گی۔