مینڈک میں کینسر کو ختم کرنے والا حیرت انگیز علاج دریافت

جاپان ایڈوانسڈ انسٹیٹیوٹ آف سائنس اینڈ ٹیکنالوجی کے سائنسدانوں نے ٹری مینڈک کے آنتوں میں ایک ایسا منفرد بیکٹیریا دریافت کیا ہے جو بغیر کسی مضر اثر کے کینسر کے خاتمے میں مؤثر ثابت ہوا ہے۔

تحقیق کے مطابق سائنسدانوں نے مینڈک اور دیگر چھوٹے جانداروں سے حاصل کیے گئے 45 اقسام کے بیکٹیریا پر تجربات کیے، جن میں سے 9 بیکٹیریا نے کینسر کے خلاف مثبت نتائج دکھائے۔ ان میں ٹری مینڈک میں پایا جانے والا بیکٹیریا ایوِنگیلا امریکیانا سب سے زیادہ مؤثر ثابت ہوا۔

رپورٹ کے مطابق صرف ایک خوراک کے استعمال سے یہ بیکٹیریا تجرباتی چوہوں میں ٹیومر کو مکمل طور پر ختم کرنے میں کامیاب رہا۔ حیران کن طور پر 30 دن بعد دوبارہ کینسر کے خلیات داخل کیے جانے کے باوجود بھی کوئی نیا ٹیومر پیدا نہیں ہوا۔

سائنسدانوں کے مطابق یہ بیکٹیریا دو طریقوں سے کام کرتا ہے۔ ایک جانب یہ براہِ راست ٹیومر کو نقصان پہنچاتا ہے جبکہ دوسری جانب جسم کے مدافعتی نظام کو متحرک کرتا ہے تاکہ جسم خود کینسر کے خلاف مؤثر انداز میں لڑ سکے۔

تحقیق میں بتایا گیا ہے کہ یہ بیکٹیریا کم آکسیجن والے ماحول میں بھی زندہ رہ سکتا ہے، جو کینسر کے ٹومرز میں عام ہوتا ہے، اسی وجہ سے اس کی افادیت میں اضافہ ہوتا ہے۔ ابتدائی تجربات سے یہ بھی ثابت ہوا ہے کہ یہ بیکٹیریا محفوظ ہے کیونکہ یہ جلد خون سے خارج ہو جاتا ہے اور صحت مند خلیات کو نقصان نہیں پہنچاتا۔

سائنسدانوں کا کہنا ہے کہ یہ دریافت مستقبل میں کینسر کے علاج کے لیے ایک نئی امید ثابت ہو سکتی ہے، تاہم انسانوں پر اس کے استعمال سے قبل مزید تحقیق اور کلینیکل آزمائشیں ضروری ہیں۔ محققین اب یہ جانچنے میں مصروف ہیں کہ آیا یہ بیکٹیریا دیگر اقسام کے کینسر کے علاج میں بھی مؤثر ہو سکتا ہے یا نہیں، اور اسے موجودہ علاج کے طریقوں کے ساتھ کس طرح استعمال کیا جا سکتا ہے۔