ایف سی بلوچستان کے درجنوں میڈیکل کیمپس، ہزاروں مریضوں کا مفت علاج

سیکیورٹی فورسز کی جانب سے بلوچستان کے دورافتادہ اور پسماندہ علاقوں میں فلاحی سرگرمیوں کا سلسلہ جاری ہے، جس کے تحت ایف سی بلوچستان کی جانب سے صوبے کے مختلف اضلاع میں 39 فری میڈیکل کیمپس کا کامیاب انعقاد کیا گیا۔ ان کیمپس کے ذریعے قلعہ سیف اللہ، کوہلو، چمن، ژوب، ڈیرہ بگٹی، قلعہ عبداللہ، سبی اور لورالائی سمیت دیگر علاقوں کے 5 ہزار 640 سے زائد مریضوں کا مفت طبی معائنہ کیا گیا اور انہیں مفت ادویات فراہم کی گئیں۔ ان مفت میڈیکل کیمپس میں خواتین، بچوں اور بزرگ شہریوں کو صحت سے متعلق خصوصی طبی آگہی بھی دی گئی۔ مقامی مستحق افراد نے دورافتادہ علاقوں میں سیکیورٹی فورسز کی جانب سے فراہم کی جانے والی ان طبی سہولیات کو بھرپور انداز میں سراہا ہے۔