پاکستان گلوبل مینٹل ہیلتھ سمٹ 2026 کا آغاز کل اسلام آباد میں ہوگا، وزارتِ صحت نے تفصیلات جاری کر دیں

ترجمان وزارتِ صحت کے مطابق پاکستان میں ذہنی صحت کے شعبے کو بہتر بنانے کے لیے “گلوبل مینٹل ہیلتھ سمٹ 2026” کا آغاز کل سے اسلام آباد میں ہو رہا ہے۔ تین روزہ اس اہم سمٹ میں ملک بھر اور دنیا بھر سے 300 مندوبین شرکت کریں گے۔

ترجمان نے بتایا کہ اس عالمی سمٹ کا بنیادی مقصد بچوں، نوجوانوں اور مجموعی معاشرے کے لیے مستقبل کے تقاضوں سے ہم آہنگ ایک مضبوط اور مؤثر ذہنی صحت کا نظام تشکیل دینا ہے۔ سمٹ کے دوران وفاقی و صوبائی حکام، ملکی اور بین الاقوامی ماہرینِ صحت کے علاوہ نوجوان بھی بڑی تعداد میں شریک ہوں گے، جو ذہنی صحت سے متعلق پالیسی اقدامات کو عملی شکل دینے کے حوالے سے تفصیلی غور و خوض کریں گے۔

سمٹ کے دوران خصوصاً بچوں اور نوعمروں کی ذہنی صحت کی بہتری اور تحفظ سے متعلق کئی اہم قومی پروگراموں کا باضابطہ اجراء کیا جائے گا۔ وزارتِ صحت کے مطابق اس اہم سمٹ کے اختتام پر ذہنی صحت کے عزم کو آگے بڑھانے کے لیے “اسلام آباد ڈیکلریشن آن مینٹل ہیلتھ” منظور کیا جائے گا، جو مستقبل کی حکمت عملی کی بنیاد بنے گا۔