پاکستان میں نیشنل مینٹل ہیلتھ پالیسی 2026-2035 کا اجرا

پاکستان میں نیشنل مینٹل ہیلتھ پالیسی 2026-2035 کا باضابطہ اجرا کر دیا گیا ہے، جس کے تحت ملک کے 3 کروڑ 24 لاکھ افراد تک ذہنی صحت کی سہولیات پہنچانے کا ہدف مقرر کیا گیا ہے۔ اعداد و شمار کے مطابق پاکستان میں اس وقت صرف 5 فیصد آبادی کو ذہنی صحت کی سہولیات تک رسائی حاصل ہے جبکہ 95 فیصد ٹریٹمنٹ گیپ موجود ہے اور فی ایک لاکھ افراد کے لیے صرف 0.19 ماہر نفسیات دستیاب ہیں۔ نئی پالیسی کے تحت ذہنی صحت کو بنیادی صحت کے نظام کا حصہ بنایا جائے گا اور اسکولوں، بنیادی مراکز صحت اور کمیونٹیز میں اس کی معاونت فراہم کی جائے گی، جبکہ بچوں، نوجوانوں اور ابتدائی تشخیص پر خصوصی توجہ دی جائے گی۔ دریں اثنا، اسلام آباد میں یکم اور دو اکتوبر کو جاری گلوبل مینٹل ہیلتھ سمٹ میں عالمی شراکت داری، عملی اقدامات اور ذہنی صحت کے نظام کو موسمیاتی خطرات سے ہم آہنگ کرنے کے عزم کا اظہار بھی کیا گیا ہے۔