پاکستان میں 3 کروڑ 20 لاکھ افراد کو ذہنی صحت کی نگہداشت کی ضرورت : ڈاکٹر مختار برتھ

:

وفاقی وزیر برائے قومی صحت ڈاکٹر مختار احمد بھرتھ نے انکشاف کیا ہے کہ پاکستان میں تقریباً 3 کروڑ 20 لاکھ افراد کو ذہنی صحت کی نگہداشت کی اشد ضرورت ہے، جبکہ ملک میں اس کے علاج کا خلا (Treatment Gap) 95 فیصد تک پہنچ چکا ہے۔ اسلام آباد میں دو روزہ ‘گلوبل مینٹل ہیلتھ سمٹ’ کی اختتامی تقریب سے خطاب کرتے ہوئے انہوں نے کہا کہ یہ عالمی کانفرنس کسی سفر کا اختتام نہیں بلکہ پاکستان میں ذہنی صحت کے شعبے میں عملی قومی اقدامات کا باقاعدہ آغاز ہے، اور اب وقت آ گیا ہے کہ پالیسیوں اور وعدوں کو عملی شکل دی جائے۔

وفاقی وزیر صحت نے اس بات پر زور دیا کہ ذہنی صحت کی سہولیات کو ہر بچے، نوجوان اور بالغ فرد کے گھر کی دہلیز تک پہنچانا حکومت کی اولین قومی ترجیح ہے۔ انہوں نے کہا کہ ڈپریشن، بے چینی اور دیگر ذہنی تناؤ انسولین یا ہائی بلڈ پریشر کی طرح کے عام طبی مسائل ہیں، جن کے علاج یا مدد حاصل کرنے میں کوئی جھجھک نہیں ہونی چاہیے۔ انہوں نے میڈیا ہاؤسز اور معاشرے کے تمام طبقوں پر زور دیا کہ وہ کارپوریٹ سماجی ذمہ داری (CSR) کے تحت ذہنی صحت سے جڑے سماجی رویوں اور منفی تاثرات (Stigma) کے خاتمے کے لیے بیداری پیدا کریں۔