فرانس میں طلبہ کا احتجاج، پولیس سے جھڑپیں، 1,747 افراد گرفتار

فرانس میں تعلیمی معیار، سکولوں کی خستہ حال عمارتوں، عملے کی کمی اور کلاسز میں گنجائش سے زیادہ طلبہ کی موجودگی کے خلاف ہزاروں طلبہ کے احتجاج کے دوران پولیس اور مظاہرین کے درمیان شدید جھڑپیں ہوئی ہیں، جن میں اب تک 1747 افراد کو گرفتار کیا جا چکا ہے۔ پیرس سے شروع ہونے والا یہ احتجاج اب مونپیلیے، نانٹ اور مارسیلے سمیت ملک کے دیگر شہروں تک پھیل چکا ہے، جس سے ملک کے 3700 میں سے 735 اسکول متاثر ہوئے ہیں۔ فرانس کے وزیر داخلہ لوراں نونیز نے خبردار کیا ہے کہ صورتحال فسادات کی جانب بڑھ رہی ہے جسے روکنے کے لیے تمام اقدامات کیے جا رہے ہیں، جبکہ وزیر انصاف ژیرال دارمانین نے کہا ہے کہ مظاہرے اب امنِ عامہ کے لیے سنگین مسئلہ بن چکے ہیں۔ دوسری جانب وزیر تعلیم ایڈوار ژیفغے کا الزام ہے کہ طلبہ کی اس تحریک کو غیر متعلقہ افراد نے اپنے مقاصد کے لیے استعمال کیا ہے۔ یہ مظاہرے ایسے وقت میں شدت اختیار کر رہے ہیں جب حکومت کی جانب سے مجوزہ بجٹ میں تعلیمی فنڈز میں کمی کا بھی اعلان کیا گیا ہے۔