جموں و کشمیرنہ کبھی بھارت کا اٹوٹ انگ تھا، نہ ہے اورنہ ہوگا، پاکستان

اقوام متحدہ کی جنرل اسمبلی کی تیسری کمیٹی کے اجلاس میں پاکستان کے فرسٹ سیکرٹری سرفراز احمد نے بھارتی نمائندے کے بیان پر سخت ردِعمل دیتے ہوئے حقِ جواب (Right of Reply) استعمال کیا اور دوٹوک الفاظ میں کہا کہ جموں و کشمیر نہ کبھی بھارت کا اٹوٹ انگ تھا، نہ ہے اور نہ ہی کبھی رہے گا۔ انہوں نے واضح کیا کہ مقبوضہ جموں و کشمیر بھارت کا کوئی داخلی یا اندرونی معاملہ نہیں بلکہ اقوام متحدہ کی سطح پر تسلیم شدہ ایک بین الاقوامی تنازع ہے۔

سرفراز احمد نے اپنے بیان میں کہا کہ کشمیری عوام کے حقِ خودارادیت کی ضمانت اقوام متحدہ کی سلامتی کونسل کی متعدد قراردادوں میں موجود ہے، تاہم بھارت ان پر عملدرآمد سے مسلسل انحراف کر کے اپنی بین الاقوامی ذمہ داریوں کی سنگین خلاف ورزی کر رہا ہے۔ پاکستانی مندوب نے مزید انکشاف کیا کہ بھارت نہ صرف کشمیریوں کے بنیادی حقوق سلب کر رہا ہے بلکہ پاکستان میں بدامنی پھیلانے کے لیے مختلف دہشت گرد گروہوں کی مالی سرپرستی اور معاونت میں بھی ملوث ہے۔