دوا فروخت کرنے کیلئے ڈاکٹر بھی لائسنس کا پابند ہے، وفاقی آئینی عدالت

وفاقی آئینی عدالت نے ایک اہم فیصلے میں قرار دیا ہے کہ رجسٹرڈ ڈاکٹر اپنے مریض کو نسخے کے مطابق دوا تجویز کرنے کے ساتھ فراہم تو کر سکتا ہے، تاہم وہ ڈرگز ایکٹ 1976 کے تحت مطلوبہ لائسنس کے بغیر کوئی میڈیکل اسٹور یا ریٹیل ڈرگ آؤٹ لیٹ نہیں چلا سکتا۔ چیف جسٹس امین الدین خان کی سربراہی میں 2 رکنی بینچ نے پشاور ہائیکورٹ ڈی آئی خان بینچ کا 5 جون 2023 کا حکم کالعدم قرار دیتے ہوئے خیبرپختونخوا محکمہ صحت کی اپیل منظور کر لی۔ عدالت نے اپنے 9 صفحات پر مشتمل فیصلے میں واضح کیا کہ فارمیسی ایکٹ 1967 کے تحت ڈاکٹر کی رجسٹریشن اسے ڈرگز ایکٹ کے تقاضوں سے مستثنیٰ نہیں کرتی اور لائسنس کے بغیر ادویات کی تجارتی فروخت قانوناً جرم ہے۔ عدالت نے ڈرگ انسپکٹرز کی جانب سے کی جانے والی کارروائیوں کو بھی قانونی قرار دیتے ہوئے کہا کہ عوامی صحت کے تحفظ کے لیے لائسنسنگ کا نظام آئینی طور پر بالکل درست ہے، لہٰذا اس معاملے کو متعلقہ قانونی طریقہ کار کے تحت آگے بڑھایا جائے۔