سیاسی جماعتوں سےامید نہیں رہی، اصلاح نہ ہوئی تو کاکروچ باہر آئیں گے: سعد رفیق

مسلم لیگ (ن) کے رہنما اور سابق وفاقی وزیر خواجہ سعد رفیق نے ایک تقریب سے خطاب کرتے ہوئے موجودہ سیاسی جماعتوں کی کارکردگی پر شدید برہمی کا اظہار کیا ہے اور خبردار کیا ہے کہ اگر سیاسی جماعتوں نے اپنی اصلاح نہ کی تو پھر “کاکروچ باہر آئیں گے”۔ انہوں نے کہا کہ جماعتوں کو ایک دوسرے پر الزامات لگانے اور چاپلوس پیدا کرنے کا سلسلہ بند کرنا ہوگا کیونکہ عوام ملک میں تیزی سے بددل ہوتے جا رہے ہیں۔ خواجہ سعد رفیق کا کہنا تھا کہ ماضی میں ہم نے اپنے ہی لوگوں کے ساتھ سوتیلے باپ جیسا سلوک کیا ہے اور اب سیاسی جماعتوں کی سیاسی عمر زیادہ نہیں رہی۔ انہوں نے اس بات پر بھی زور دیا کہ مڈل کلاس کو اسمبلیوں میں آنے کا موقع ملنا چاہیے، لوکل گورنمنٹ کا مؤثر نظام قائم کیا جائے اور عوام کے انتخابی فیصلوں کو دل سے تسلیم کیا جائے تاکہ ملک مزید سانحات سے بچ سکے۔