لوئر دیر میں پُراسرار بیماری سے 7 افراد جاں بحق، درجنوں بچے زیر علاج

تحصیل ادینزئی کے پہاڑی علاقوں برمکے، بوچکے اور شادام میں ایک پراسرار بیماری کے باعث 2 خواتین اور 5 بچوں سمیت 7 افراد جاں بحق ہو گئے ہیں، جبکہ اہل علاقہ کا کہنا ہے کہ گزشتہ 16 سال سے ہر سال اسی ماہ ایسی اموات ہوتی چلی آ رہی ہیں۔ ڈی ایچ او ڈاکٹر محمد نیاز آفریدی کے مطابق ابتدائی رپورٹ میں برمکے میں مرنے والے دو بچے پری میچور تھے، بوچکے کے دو نوجوان پشاور میں گردن توڑ بخار کا علاج کروا رہے تھے جبکہ جاں بحق خاتون ٹی بی کی مریضہ تھیں۔ محکمہ صحت کو بوچکے سے تیز بخار اور فیبرایل بیماری کی اطلاعات ملنے پر متاثرہ علاقوں سے سیمپلز اکٹھے کر لیے گئے ہیں اور ڈیگی و ملیریا کے خلاف سپرے بھی کیا جا چکا ہے۔ محکمہ صحت، لائیو سٹاک اور پبلک ہیلتھ پر مشتمل مشترکہ تحقیقاتی ٹیم تشکیل دے دی گئی ہے جبکہ حتمی وجوہات لیبارٹری رپورٹس کے بعد سامنے آئیں گی۔