برطانوی ہائی کمشنر جین میریٹ کی نائب وزیرِ اعظم و وزیرِ خارجہ اسحاق ڈار سے ملاقات، دوطرفہ تعلقات اور علاقائی صورتحال پر تبادلہ خیال

برطانوی ہائی کمشنر جین میریٹ نے اسلام آباد میں وزارتِ خارجہ کا دورہ کیا جہاں انہوں نے نائب وزیرِ اعظم و وزیرِ خارجہ سینیٹر محمد اسحاق ڈار سے ملاقات کی۔ ملاقات کے دوران پاک-برطانیہ تعلقات کے مختلف امور پر تفصیلی بات چیت کی گئی، اور دونوں فریقوں نے دوطرفہ تعاون میں ہونے والی مثبت پیش رفت کا خیرمقدم کرتے ہوئے اسے مزید فروغ دینے کے لیے آئندہ کے رابطوں پر تبادلہ خیال کیا۔ اس کے علاوہ ملاقات میں بدلتی ہوئی علاقائی صورتحال پر بھی خیالات کا تبادلہ کیا گیا۔ نائب وزیرِ اعظم و وزیرِ خارجہ اسحاق ڈار نے کشیدگی کو کم کرنے کی کوششوں کی اہمیت پر زور دیا اور اس غیر متزلزل عزم کا اعادہ کیا کہ تمام تنازعات کے پرامن حل کے لیے بات چیت اور سفارت کاری ہی واحد قابلِ عمل راستہ ہیں۔